aywah ...
oumourkom???
bettbi3a labass 3add ... chkoun kifna
echa3b ettounssi kima ech3oub el 3arabeya el koll 3adda sif behi essné
sif mé sarach...
melloul el coupe du monde we koura we jaw
we emba3ed jet el 7arb
normal mé te7chmouch ... 9oulou kifi ... el 7arb fiha jaw akthar ah???
s7i7 fel coupe du monde temrejna chowya men 7keyet les codes ta3 les chaines elli ey3addiw fel matchouwet, we rassetelna nal3bou fel 7ossila m3a el bouquet SRG SWISS we les chaines te3ou (TSR1 TSR2 ...) ema el 7amdoullah t3addat salamat we tfarrejna fel matchouwet el koll presque.
ema 3andi likom 5abar sayya2 jiddan jiddan ...
el 79i9a manich 3aref kifech bech n9oulhelkom
ayya barka je balance tout, hakka walla hakka taw tasm3ou biha la7keya
ya sidek 9allek CANAL+ eyh CANAL+ chret 79ou9 el bath mta3 el 7arb el jeya!!!!
ma3neha terzinaaaaa!!!!
eyh hedha ech 9al el bere7 BUSH elli 3aynouh ra2is el mounadhema el jedida mta3 el 7arb !!! eyh maw kima el koura 3endeha el FIFA, el 7arb 3amloulha el FIWA (Fédération Internationale de War Association) ...
we zid sma3t elli el jazeera bech t7el zouz 9anawet jdod esmehom El Jazeera War1 wel El Jazeera War2.
ma3neha ya chabeb el 7arb el jeya bech trassilna nechriw fel les cartes ta3 l'ART, we 9allek l'abonnement elli fih hal zouz chanètes b 680 dinars el trimista, ma3neha bel 7a9 terzinaaaaa(9oulou amin), ema 9allek elli ye5ou abonnement eb 6 ochhera ye5ou m3ahom el jazerra sport1 we 2 blech (ma7ssoub taw ki tabda thamma 7arb, chkoun bech yetleha bel koura)
we zid haka el chay5 weld 7ram el 9ot3i moula ba9èt ART 9allek kré jaych kamel mta3 boulisseya bech eydourou eyrafflou we eysakkrou elli 9hawi elli yal9awhom em5allin echa3b yetfarrej fel 7arb mou9abel 7a9 capucin !!!! eyh n3am.
ema mé t5afouch bazz taw Tounes7 techri el 7arb m'sajjela, s7i7 bech netfarrjou fiha emma5er chowya ema 5ir men blech, we 7atta ken me chrouhech taw netfarrjou fel 7awssela mta3 el 7arb m3a razi el guanzou3i fel barnamej el jdid mta3ou "il A7ad il 7arbi".
lé welli eyghidhek akthar elli el FIWA bech t5alli el chainat ta3 el radio t3addi el 7arb blech!!
ma3neha ey7ebbouna nmoutou b7assretna!!! nassm3ou we mé nchoufouch .... ey3attchouk we mé eycharrboukech!!!
eyh wallah mass9atthom!!!
ma3neha bech ye7remouna men hakka allama il3a2ileya ellatifa 3la barnamej 7assadou el yawm!!
na3annnnnn
we yehredou el 9ahawi elli fihom talveza
we yehredou el 7ammessa(eyh mahou fi i7ssa2eya 3malha el INS (Institut National des statistiques) 9allek el i9bal 3la el moukassarat wel fawakeh el jaffa yokther wa9t el 7arb)
we bech yehredou zeda dour ennacher wel jarayad(zeda fi i7ssa2eya o5ra 3malha el INS 9allek elli 80% mel 9orra2 yechriw fel jarayed 3la 5ater haka el a5bar el 3ajla elli maktouba fel newsbar el vitesse mta3ha 9weya we mé eynajmouch ya9raweha , hadheka alech yechriw fel jarayed)
we bech yehredou zeda el awliye2 bel les cours particuliers ta3 el joghrafya (fi i7ssa2eya o5ra 9allek 92% mel tlémdha et7assnet a3dédhom fel joghrafia melli bdét el 7arb, chbik tawa esshel ayy wa7ed 3al fallouja we karkouk we 3aytaroun we bent jbil taw ye7kilek 3lihom bel tafssil !!!)

3lah hakka ey7ebbou ye7remouna ba3d mé sannsouna, ti 9allek tawa fel makteb essghir elli yesshoulouh ech t7ebbi twalli ey9oul .... ayya tall3ou trah .... lé lé mouch tbib, ya 7assra 3la tobba .... lé mouch kawerji zeda ... ti lé mouch mzewdi ... eyh hadhika heya mourassal eyh kima ghassan ben jeddou we walid el 3omary !!! eyh eyh (fiha barcha flouss el 5edma hadhika emmela)

hadheka alech el a7zab el tounsseya el mou3ardha welli mouch mou3ardha, wel jam3eyyet mta3 el mojtama3 el madani 9allek mnadhmin tadhahora 7achda ghodwa fi naffs el wa9t wel blassa elli 3amlou fiha el moudhehra ta3 el "moussenda" el lobnan we filastin
en7ebbekom etkounou mawjoudin eb kathra bech tssèndou el 9adheya mta3na (la la mouch 3la filastin we lobnan na7ki!! tachbik ti rakkez ya 3zé) el 9adheya el aham wel akbar elli heya 7a99na fel forja... eyh s7i7 mé konnach 3atinou 9ima 5ater ken 7a99 moktasseb, ema tawa haw newin eyfokkouhoulna!!!
mé lazemnech nosktou ahhhh
lé wel ad'ha wel amar elli elkollhom jéw dheddna ...

7atta men el sayed 7assan nasrallah elli konna 3a9din fih ennawara 9all fi 5itabou el bere7 elli 9anat el manar bech twalli mouchaffra, codé ma3neha!!
eyh we BEN LADEN we El Dhawahri 9allek el tassri7at el sawteya mta3hom bech twalli bel flouss!!!!
ye3jebekchi tawa!!!!!!
eyh we 9allek WARNER BROS wel Metro-Goldwyn-Mayer tféhmou bech eybi3ou les DVD ta3 el saison 7 ta3 el 7arb eb 900$ !!!
we houma zeda kima lo5rin kréw fayla9 kamel men 3and el marines bech yamn3ou el gravure fel 7wenet!! eyh eyh
7atta men haka el wabch BILL GATES ki 3adtou estghal el maw9ef ... eyh 9allek el version eljdida ta3 jeu AGE OF EMIPERS IV elli fiha 7ezb allah we israel wel 3ira9 3amlou fiha faza jdida ta3 securité we raddouha impossible a cracker !!!
ya wallah a7wel
ma3neha tssir 7arb we mé netfrajjouch!!!
tssir 3arka we mé netfarrjouch!!
eyssir accident we mé netffarrjouch!!!

el forja el forja el forja el farja el forja el forja el forja el forjaaaaaaaaaaaaaaaaaaaaaaaaa


ajdedna t7arkou, abé2na sektou, na7na netfarjou, we allahou a3lam weledna ech bech ya3mlou
we dhéka icheblou men dhéka al assad
kraht rou7i, karht 7yeti, kraht dho3fi, kraht même el kerch elli jebetni

salam
ellila n7eb ne7lem ...
we n7ebbkom te7lmou m3aya ...
n7eb ne7lem belli ena tracha7t el manssab ra2is el dawla ...
we bettbi3a bech en9oulelkom klem we nou3edkom ebwou3oud manich bech noufi biha
we n7ebbkom te7lmou elli entouma inta5abtouni ...
we bettbi3a nje7t fel inti5abat ( ne7lem ah )
we tawa za3ma ech bech na3mel???
bettbi3a el 7aj baba bech en7ottou moufti el joumhoureya (lebnet el juppet wel dékolté dabbrou fihom bi3a men tawa :P
louled elli mtawal cha3rou ey9essou ... welli yelbess ballouta ... mane7kilkomch :P
we menghir mé tjiw techkiwli ... el 7aj mé ye5sser 3leya ken chtraaaafff bech yo9na3ni :P)
ti el 7assel El_7aj bech eywalli boukom el koll, welli mé klech ... bech yekel
behiii ena tawa ra2iss ...
we kima ta3rfou el moujtama3 mta3na fiha barcha machakel ...
lidha bech nsala7hom...
ena nra elli aghlabeyet el mechekel neb3a mel 3la9a bin errajel wel m'ra, ti mathammach asslan 3ala9a ki tjiw tchoufou, 7kit 3liha 9bal we ne7ki 3liha tawa we bech no93ed ne7ki 3liha 7atta el tet7al hal mochkela, (yomken 3la 5ater hedhi mochkelti ... ti la3alayna tawa 7ssoultou we wallit ena ra2is we bech na3mel elli fi mo5i) ... we lidha bech enna7ilkoum koll el sou3oubat wel 3ara9il elli tet3ardhoulha bech ta3mlou walla bech t7afdhou 3la 3ala9at 7ob (ya3tini klab).
ezza7, wesselna el mar7ela mo5tera, louled ey9oulou 3al bnet elkollhom kif kif, wel 7lib mawjoud fel sou9 lweh nechri fi bagra ( 5atini hakka ey9oulou, we na9ilou el kofri layssa bi kaffer ), we l'bnet zeda ey9oulou errjel wel zmen mé fihomch aman we ... ( mana3refch ess2elou 5wetkom lebnet taw ey9ouloulkom )
lidha bech na3mel kima al mathal : "ya9oudounahom ila al janneti bel salassel"
bahi awal 7aja bech na3mlelkom des caméra, we des ecrans geants fi koll blassa bech kif na3mel 5itab tassm3ouni ( Oueld El 7aj is watching you )
ayya ilaykom awal 5itab bech na3mlou :
ayyouha el mouatinoun ... ayyatouha el mouatinet ...
walla ta3rfou kifech ...
ayyouha el cha33b ...
la9ad 9arrartou al 2ati :

1-il zawaj ijberi lel rajol wa lel mar2a 3enda boulough el 3ichrin (20 sena)
2-toukélou mouhemmet el be7th 3an el 3azibin wal 3azibet ila 9owet el jaych wal chorta (elli ya7ssrou el rafel 3azeb direct el 7ajjem we mba3ed el baladeya, kif kif lelbnet)
3-i9amat jihez iste5barat lel ba7th 3ani el 3azibin wal 3azibet el mou9imin 5arej ardh al watan (ma3andkom fin harbin...)
4-man yata9addem lel zawej 9abl el sénn el madhkour a3lah youkafa2 we yossnadou ilayh wissem eljoumhoureya
5-man yablough el 3echrin wa layssa ladayh charikon lel 7ayat al zawajiya yatèm i7alet milaf al madhkour ilya cha5sseyan li i5tiyar zawj aw zawja lahou 7assaba el jens (ma3neha eyjibouli war9a fiha jadwel, assami lebnet el 3azibet 3al eymin we louled 3al eyssar... wena nabda norbet bel flechétt ...)
6-tatakaffalou el dawla bi massarif el zawaj fi koll el 7alat (f9ir walla ghney ... bech t3arrsou 3la kifi :P)
7-fi ajal adnah 9 achhor wa a9ssah 12 chahr min tari5 3a9d el zawaj yanbaghi 3la al rajol we zawjatohou etta9adom bi chahadat miled tiflihouma awa atta9adom bi chahada tebbeya toufidou 3adama 9odreti attarafayn 3la al injab (welli jebou twema ... eyssayfou ba7dheya fel 9ssar )
8-ba3d al zawaj, al jenss aw al mou3achra el jensseya tatimou 3 marrat fel yawm 3ala a9al ... 7atta al mawt, aw al istedhhar bi chahada tebbeya tothbetou 3adam il 9odra 3ala el mou3achra, wa massarif al 3ilaj 3ala addawla.
( hedhi ellila ta3eb walla ta3ba walla ma3inich walla mannajamch .. tansawhaaaa)
9-al tala9, wal 5iyana kalimatan tamma 7adhfouhouma mina el 9amouss, we man yartikibouhouma yatemmou ramyouhou bel rassass 7atta el mawt
10-koll mo5alafetin lil 9awanin al madhkoura a3lah to3aridhou al mou5alifin li mou7akama 3asskareya
( bettiba3a fi le5er el 7okm wadha7 ... ramyan bel rassass )
{ tawa lazemkom etsaff9ou, comme meme ( orchea :p ) ra2is rani }

el 7assel ayya enfi9ou tawa, la ta3mlou 3leya in9ileb :P

Medem el wa9e3 manajjamtech enbaddel fih 7aja, 5alli 3al a9al enbaddel fi a7lémi ...
we kima ey9oul El_7aj ...
weldii ...
elfeyda fel héné

chokr 5ass el si imed li moussehmtou el 9ayma fi kitebet 9awanin el dawla

assalamou 3alaykom
assalam 3la asdi9a2i
assalam 3la asdi9a2 al kalimet wal afkar
aywah
lé mé t5afouch mahouch jweb mta3 suicide :p
3endi barcha mé postit chay :'( we hedha li asbab 5arja 3an nita9i
inchallah rja3na we roujou3 bi 9owa ken sahhel rabbi
el youma bech na7kilkom 3al 7aj
el 7aj baba elli ena oueldou betbi3a :p
barra nabdaw melloul
awal dhekra walla taswira na39elha heya taswiret baba emrawa7 mel 5edma
na39lou labess lunette rayban we sac sghir fi yeddou (ken bougoss 3la fekra) we na39al zeda elli houa ken yadh7ak ... 3endi snin mé ritouch yadh7ak ... el dho7k fi wa9tena walla s3ib apparament
3ad fel toufoula mta3i et3addet scénario wa7ed en boucle dima ness2el fi sou2alet 3ajiba kima ayy wa7ed fikom kima :
ena : baba baba ye5i el tayara fiha zommara kima el karheba
El_7aj : euhhhhhh mana3.... chtrafff ti na9ess mel bleda mte3ek we barra ched droussek (maw mayjich el bou ey9oul 9oddem weldou elli hoa mé ya3refch)
ena : baba baba ye5i ech 9a3din ya3mlou haka el 9tatess (scène 3adeya mta3 9attouss we 9attoussa yetkathrou fi errbi3)
El_7aj : chtrafff ti na9ess mel bleda mte3ek we barra ched droussek (7a99ha el chtrafff heya 3ou9ouba tetrawe7 bin 9arrsa 3la wedhneya we bin 5off 3la mou2a5ert ra2ssi)
ena : baba baba a3tini sigarou 5alli netkayef kifik
E_7aj : chtrafffff (dawdi direct men ghir mou9addimet)
ena : baba baba ech ma3neha za***** (kelma 5ayba bel tbi3a) haw 9alhali foulen weld 3ammi foulen
El_7aj : chtraffff (dawdi mta3 7achekom 5nenti telsse9 fel 7it) mani 9otlek ma3adech ettabba3 hal emmarek ( we bettbi3a el foulen elli 9alli hal kelma bech ye5ou dawdi kifi, baba 3endou el moussawet wel 3adl tabdech weld wezir tekel bayek, mathammach 7ad fi 7oumti mé klech tri7a men 3endou we kif etzid trawa7 et9oul el bouk etzid tekel tri7a o5ra, fel 7ouma 9bal medem el 7aj 3tak tri7a rak baz testehel ... bettbi3a tawa lel2assaf tbaddlet barcha 7ajet )

3ad kima ritou el toufoula et3addet el kolleha chtraffff presque
jinech lel mourah9a, el mourah9a kima ta3rfou lezem el wa7ed fina eywalli ye5ou massrouf 7aja tabi3eya, ema el mochkela elli El_7aj mongualtou wa9fa fi 3am sab3in wa9t elli ken el dourou (05 millim) eyjiblek kilo l7am.
3ad sa3at nabda bech nemchi lel cinéma m3a el chabeb sou7abi ntol 3la El_7aj fel sala nal9ah kil 3ada ya9ra fel 9our2en ... nestennah eykammel el aya we :
ena : baba baba
bettbi3a eyhezz rasou we yo5zerli
El_7aj : sada9a allahou el 3adhim
ena : baba bech nemchi lel cinéma m3a sou7abi
El_7aj : chawert ommek
ena : ey baba
El_7aj : behi mé tjich emma5er
(!!!!!!fi belou el cinema blech, dezz el beb we od5el )
ena : ey a3tini 7a9 el ticket we rkoubi
El_7aj : pfffffffffff
eymed El_7aj yeddou el jibou chtren chtren sa3a we houa eycha9cha9 fel sarf ....
El_7aj : chedd
en7el yeddi nal9a zouz dinarat!!!
El_7aj : wenti raja3 et3adda echri 5obztin we rajja3li el be9i ah
behi cheddou m3aya le7sseb ; el car eb 480 wa9teha donc machey we jay dinar, el cinéma eb 1d500, hedhom deja 2d500 we baz chowya 9tanya wé ka3ba GOUCHO el 7assel 3 dinars, zidhom 7a99 5obztin we el be9i elli bech enrajja3houlou tji 9ad 9ad.
elli yasma3 hakka ey9oul rahou Oueld_El_7aj 3oumrou mé mché lel cinéma!!! mouch s7i7 mchit ema el mechya lezemni ensabba9ha 9bal eb jem3tin mel moufawadhat we bettbi3a lezem net3adda bel oumam el motta7da elli heya ommi bettbi3a...
barra na7kiw 3la haka ennhar elli normalement nal9a fih 7adhi ... elli houa el 3id el sghir bettbi3a
3ad 9bal el 3id we fi chhar romdhan tarka7 haka el publicité ta3 el 7weyej fel talveza haw WEEK END LITE haw serwel FANTASIA haw mana3rfech chnowa wena bettbi3a enchedd rass baba echrihomli echrihomli we El_7aj ey9olli behi behi taw ejjem3a jeya nahbtou 5oudh elli et7ebb!!
elli yasma3 hakka ey9oul abab haw emsallekha Oueld_El_7aj!!
haw jekom el taktik
3ad enharet elli eyhabbetni bech nechriw le7weyej, ayya nabdaw endourou 3al boutiket elli fihem el 7ajat elli n7eb nechrihom, wé yabda el 3ardh fi esserwel hadha 9machou 5ayeb, fel maryoul hedha sel3et el 3am lifet, fel sbedri hedha 5yattou mouch behya .... el 7assel minimum 5 sweye3 eydour beya lelli enmout bel t3ab lelli eywalli ma3adech 3ini fel 7weyej we fi sbedri yech3el bel dhaw we mé 3edech 3ini fel 3id men asslou!!!...
wa9teha ey9olli ayya ija lezmek et3ayed ayya ne5tarlek ena lebssa 3la kifi.... ken en9oullou lé2 eykammel eydour beya we eydagudeguli sa9eya bel machey ... bettbi3a fi le5er nestesslem we nhez el raya el bidha... we eyrawa7 El_7aj fari7an masrouran et9oul el 3id lekbar mouch 3id el sghar!!!!
el 7assel hadhouma mo9tatafet men 7yeti
s7i7 kif nou9ef hena eyban El_7aj bih we 3lih mé mouch s7i7, kif kbert fhemt, kif 5demt fhemt, we kif bech en3arress we enjib sghar bech nefhem akther.
El_7aj moujarred mouwadhef we yedd wa7da, we jeyeb 4 sghar en plus donc kif enra elli 3amlou kif enra dar kbira fi blassa behya, kif enra karheba, kif enra 4 sghar kebrou we wallaw rjel menhom zouz ye5demou we zouz mezzelou eykammelou fi 9raythom, kif enra rou7i netsallef men 3endou flouss bech enkammel chahri pourtant ena seken blech we mekel blech nefhem 3lech.
rabbi ey9adderni bech enrajja3lou tarf men jémeylou ( el chtraffff jémeyel zeda rahou, ema mé yarj3ouch :p )
ABIII, ya 7aj, ya a7ssen bou fel denya, rabbi ey5allik, we inchallah na5let enfarr7ek we en7ajjejjek 7ajja o5ra enti we ommi.

C'est vraiment grave ce fossé qui n'arrête pas de se creuser entre les hommes et les femmes de notre société.
Ils montent tous la garde, on dirait des boxeurs, des boxeurs qui ne font que s'esquiver, des boxeurs qui ne s’affrontent pas, pourtant ils sont sur le même ring.
Pourquoi aimer est devenu si difficile, pourquoi on met tout dans le même panier, toutes les filles sont des traînées, et tout les mecs ont une bite au lieu d'un cerveau, pourquoi tout ces préjugés ... a cause d'une relation qui a foiré, vécu ou vu, d'un homme/femme qui vous a trahi, abusé de vous, qui vous a manipulé pour des fins malsaines ... est ce suffisant pour faire sortir toute la méfiance que nous avons en stock, est ce suffisant pour gommer, gratter, barrer l'espoir, la deuxième chance et les sentiments de notre dictionnaire, et ensuite les remplacer par le doute, la méfiance et le soupçon.
On a tellement monté la garde, qu'on arrive même plus à voir ou à se voir, on a tellement changer, qu'on est devenu incompréhensible l'un pour l'autre.
On est arrivé à un point ou quand un couple se sépare, on dit que c'est ce qui devrait arriver, et quand un couple se forme, on dit qu’ils ne vont pas tarder à se séparer.
Une femme qui a perdu sa virginité en dehors du mariage, est une putain, il n'y a pas de place pour l'exception.
Un homme qui passe sa jeunesse en se baladant d'un vagin à un autre, est un vrai Mâle, un viril, il n'y a pas de place pour le doute.
Un père qui laisse à sa fille une marge de liberté, dis lui pourquoi, il dirait jamais : parce que j'ai confiance en elle, il dirait et avec toute fierté : ma fille est un homme.
Quand un mec appelle une fille chez elle, c'est toute une enquête menée par les parents qui l'attend dès qu'elle raccroche.
Quand une fille appelle un mec chez lui, c'est avec fierté et joie qu'ils le regardent.
Inutile de vous rappeler qu'on est en 2006, qu'aimer est devenu une corvée, que faire confiance est de la stupidité.
On accuse toujours l'autre d'être l'origine de notre malheur, on refuse de remédier à ce problème, et si par hasard une solution se présente, on la rejette par méfiance, et continue chacun a souffrir dans son coin.
En baissant la garde, on risque de prendre des coups, on risque de se faire mal, mais au moins on a une chance de gagner, d'avancer, de savoir et de comprendre.
C'est vrai qu'on montant la garde on risque rien, mais une vie sans risque ne mérite pas d'être vécu.
J'en ai marre, je met au plus bas possible ma garde
J’enlève mes gants
Je démolis la forteresse de sable que je me se construite au fur des années
J’avance
Et c'est avec un grand plaisir que je recevrais les coups, les anciens et les nouveaux.

aywah
assalemou 3laykom
kel 3ada emba3ed ma9rit elli ktebtou el marra elli fetet
cha3elt sigharou, we 7attit el clavier fi 7ejri ...
we rja3t brou7i snin el teli ...
3ad n7eb nkammel na7kilkom 3la haka el prof mta3 el maths, we haka el wetid mta3ou ...
fi 7esset el wetid tellement el classe m3abbi nabdaw 9a3din 3 fel tawla!!!
we bettbi3a enness el koll et7assnet elnotet mte3hom
3ad kif eyji e5er el chhar, bettbi3a thamma echkoun ey5allsou wa9teha we thamma chkoun yabta 3lih,
ayya tall3ou ech ya3mel ... ya3tina exercice bech eylahhina eybih, we eymchi eyhez kartabtou we yo5rej biha 9oddem el beb,
ey7al carnih bech eythabbet fi chkoun 5allsou we chkoun mé 5allsouch, we mba3ed yejbed anssaf el wera9 elli 3ammerna fihom

assamina we a3marna we surtout koll we7ed bouh ech ye5dem, 3ad yeou loura9 mta3 ejjema3a elli mé 5allsouhech we yarja3 ...
ey7ot haka el kartaba we mba3ed yemchi el awal we7ed mé 5allsouch, we 9bal mé eykallmou ya3mel talla 3la haka el war9a we

ey9ollou : " tawa ki bouk mahendess 3lech mé t5allessnich!!!" we emba3ed yemchi lelli mba3dou " enti bouk mécanicien??? hey

bouk eywakkel fikom??? 3endkom talveza??? 3endkom férjidère??? ti ki labess 3likom maw 5allessni !!!"
el 7assel elli mé 5allsouch eysamm3ou mé yakrah !!!
mantawelch 3likom ... et3adda haka el 3am, enje7t, 3mor zeda nje7, we akthar 7aja fra7t biha heya enni fradht rou7i chowya,

3malt sou7ab we bdit nefhem el systeme,we bettbi3a el 2éme année bech etkoun s5ouna chowya
3amet el deuzième, bedhabt (2S3) 2éme Section 3, wa9teha mé thamma ken 3 classet 2ème, we bettbi3a el 2idara etnadhem el

classet mouch bel ordre alphabétik ema bel mo3addlet, we 7ossen el soulouk ...
ma3neha 7attouni m3a abham 5al9 rabbi walla m3a jma3et el mchekel wel chaghab!!
fi awal el 3am el 2oumour wadh7a, blassti heya heya e5er tawla fel eymin, bjambi si 3mor, elli kebret el sada9a mé binetna.
el profet aktherhom na3rfouhom we ya3refouna, ema kel 3ada noss el war9a mta3 etta3arof lezma!!! we bettbi3a 5edmet baba fi

haka el war9a wallat dhabet fel jaych we ken se2louni echnowa gradou en9ollhom na9ib, we 3mor kel 3ada bouh ra2is markez.
we kima ta3rfou, el 2idara mta3 el college, mé eysa3edhech emploi de temps mé fihouch 3al a9ala se3a walla zouz sweye3

creuses fel nhar!!!!el 7assel essweye3 el creuse akthar mel sweye3 mta3 le9raya!!! we haka essweye3 el creuse bettbi3a ménech

bech enraw7ou fihom ledyarna ... donc lezem en3abbiwhom eb7aja, ya bel koura, ya bel 7keyet, ya belhamla...
3ad 3ametha koll mé netlammou (bettbi3a oueld barka) na7kiw 3al bnet ... elli heya 7aja ghriba 3lina we 3leya ena bel5oussous

3la 5ater el2ountha el wa7ida fel dar heya ommi (7achekom 4 oueled fel 3ila, lelli baba we ommi na77awha men am5a5hom 7keyet jiban tofla)
3ad 9oltelkom el bnet kenou mawdhou3 7keyetna ... we wa9teha bettbi3a a7na sghar we 7ad mé 9alelna we mana3rfou chay ... we

zid haka el taswira elli fi dictionnaire Larousse mé fahhemtha chay...
3ad koll wa7ed eyjib fi 7keyet men rassou 3al bnet 3al jenss 3al weleda ... el 7assel 7keyet ghriba we 3jiba ne7chem bech

en9oulhelkom!!!!
barra hakkeka fi 3emena 9rib el 4 ochhera, 7atta lanhar jéni 3mor yejri fel sbe7 we 9alli ya ouel el 7aj afra7 ... abay ...

ech femma ... 9alli rahou 5ouya lekbir jeb cassete video porno we rani 3raft fin 5abbeha!!!! ...
abay ech ma3neha porno???!!!(ejjahl mssiba)... 3ad fasserli 3mor la7keya el koll!!!!!!!!
ahhhhhhhhhhhhhhhhh hey kifech bech na3mlou??? 9alli rahi eddar mébin nosf ennhar we madhisa3tin fergha !!!!
eyyyhhhhhhh heyel barcha!!!
ayya méjé nossf enhar ken mé rwe7na tal3et ...
nou9ezzet el sonneriemen houni, 5rajna nejriw(ena we 3mor we zouz o5rin men chelletna).
wesselna leddar,
d5alna,
93adna,
mché 3mor eyjib fel cassete,
rja3,
7atteha,
wa5er el cassete mel loul,
sakkerna el dhaw, we bda el film ...
bettbi3a ménich bech noussfelkom bel tad9i9,
ema melli bdé el film lelli wefa lé 7ad 5zar el sa7bou walla 7atta rammech 3inih!!!!!!!!!
tla3 el jinirk(eyyyh el film bel jinirk, we bel mo5rej, wel cameraman we el jema3a el koll!!!!)
93adna yomken draj we na7na 3rou9atna chertella we netnaffsou ebzarba et9oul konna na3mlou fi course!!!!
ayya sadd9ouni el wa9teha 3rafna elli el mébin sé9ina, ennajmou nesta3mlouh fi 7ajet o5ra a part tatyir el mé!!!
wa9teha 3rafna bdan lemra chnowa chaklou!!!!
el 7assel 3rafna barcha 7ajat ( eykather 5irek ya 3mor, nawertena allah eynawerek :p ).
we bettbi3a fel sweye3 el creuz wallina massder wathi9 lel ma3loumet wel jmou3 ennhar el koll yetcha7tou fi 3mor bech

eyhezzhom yetfarjjou ... ema 5ou 3mor mé 3awedch jeb cassette donc 9a3det ejjmou3 teghabben!!!
emchi ye zmen we eyja ya zmen ...
ya3mlou haka we eyjiboulna telmidh jdid fel trimista el theltha (3ème trimestre)
ken ya9ra fi wileya o5ra ema darhom na99lou ye5i jebouh ba7dhena!!!
hal telmidh hedha esmou Nidhal, dh3ayef 9ssayer, ema madhi we mhaf!!!
ayya t3addet el jem3a loula we elkollhom 7a9rinou, we yetbouldou 3lih (el 2iste9bal mta3 el 3ada)
mba3ed tla3 tfol dhamer we 5dha blasstou m3ana we fradh rou7ou (mani 9oltelkom madhi :p )
3ad lanhar na7kiw 3la haka el cassette (mawdhou3 esse3a) we 3al lebnet wel jenss ...
d5al si Nidhal fel 7keya we bdé ye7ki bi koll thi9a fel nafss we 3an sebe9 me3refa !!!!
abay... mnin jetek hal ma3loumet el koll???!!!
dh7ak dha7ka mta3 malla bheyem we jbed stouchou ...
jbed mennou war9a metweya 20 tawya we 7alleha...
tal3at war9a em9atte3a men majella iba7eya!!!! fi mera mé lebbsa chay!!!!!!
el 7assel haka el taswira etraychet mel jabda we mel 3ark we men a3tini netfarrej!!!!!
el 7assel haka ettrimista sik Nidhal ken el malek bidoun mouneze3!!!
ennhar we toulou we houa eyjib fel majellet wel tssawer...
7atta el bnet ye5dhou men 3endou!!!
walla ay we7ed 3endou sou2el walla 7aja ey7eb ya3refha... lé ey7el dictionnaire lé yab9a ey5ammem!!!
Médem Nidhal mawjoud, koll chay mafhoum!!!
....
....
trannnnnnnnn!!!!!
wé lel7adithi ba9eya!!!

ayyya 3asslémtkom,
ayya trah 5alli na3mel talla 3alli ktebtou el marra lifetet ...
... ah, oh abay ... ya3tini 3eza
ena 7kit hedha elkoll ... :)
ti el mouham, médem estarja3t afkari 5alli enkammel lé7keya
EL MOURAH9A ... ih ...
heya kima ey9oul 3elm el fiziolojia : hormounet tal3ou lessma, we ka3boura tal3etli fi garjoumti we 7ab echebeb kleli wejhi
El morah9a zeda 3endeha ta3rif fel mojtama3 wel 3ayla ettounssia kima : haw kber we 3mal chleghem, we haw cham snanou, we

haw eysa77a7 fi rassou ... we het meka la7keyet.
Ena man9oulech elli el mourah9a mta3i et3addet exceptionnelle, yomken zeda elli bech na7kih et3adda 3la barcha 3bed ...
ti ma7ssoub ... echkouni ena, maw wa7ed parmi des millions ...
el 7assel, bettbi3a 5rajt mel makteb we d5alt lel college!!!
haka el college melloul dhharli kif el ghaba, kif el a7rach, mesteness fel makteb na3ref enness elkoll
ema ghadi mana3ref 7add ... elkollhom ey9oulou fel klem el zeyed, koll sa3a tel7em 3arka !!!
wena ched tarkina we 5ayef...
s7i7 fel makteb zeda thamma 3ark ... ema 7ad maydour beya ...
3lech ??!! 3la 5aterni Ouel el 7aj
mel sokken el awa2el mta3 el 7ouma.
ema el college elli 7attouni fih fi 7ouma o5ra ...
donc lezem barcha 5edma bech na3mel essem ...
ti la 3alayna ...
awal enhar ... awal seance ...
we mba3ed mé s2elt 80 telmidh ... el 9it essala elli ena na9ra fiha ...
hey da99it el beb ... we 7allitou
doub mé 7attit sé9i fel sala etlaffetli el prof we gu7erli we etlaffet lel class we 9allhom :
" Hedhouma houma le3bed elli man7ebbhomch !!!"
ena 3ad esket we et5albezt we ma3adech 3aref rou7i ech na3mel!!!
ayya 3ad emba3ed draj mel suspence 9alli hayya od5el,
ye5i ena fleche el a9rab blassa fergha elli heya jet ettawla le5ra fel saffa leymin
we bettbi3a ettawla fiha zouz blayess, ena rkecht m3a el 7it directe!!!
we kammel el prof ya7ki wena mani fehem chay melli 9alhouli!!!
abay errajel awal marra eyrani, we 9alli nakrhek!!!!!
el 7assel wena na3sser fi mo55i bech entalle3 3lech : 9olt belekchi dhrabtlou weldou, walla sre9tlou ka3bet toffa7 mel jnina

mte3ou ... walla el 7aj baba ghelbou fi tor7 chkoba ....
wena hakkeka, da9 el beb we tall 3lina tfoll ...
we el prof 3mallou naffss el scenario eli 3malhouli
gu7erlou we 9allou : " Hedhouma houma le3bed elli man7ebbhomch !!!"
wa9teha fhemt elli houa yo9ssed 3al retard ...
we haka ettfol 3mal kifi bel dhabt ... fleche jé lsse9 ebjenbi!
we tleffet el prof we 9al ayya ejbdou noss war9a koll we7ed wektbou fiha essmelk wela9abbek we 3omrek wefin kont ta9ra we

9addech jebt mo3addel fel sizème .... etc we surtout esm bouk we ech ye5dem!!!!!!!!!!!!!
3ad etlaffetlou elli bjanbi bikoll wa9a7a (essmou 3mor we tla3 9ra m3aya fel makteb fel oula ibtide2i ... el 7assel 93ad

bjanbi fi haka el blassa 5 snin mel college le lycéé) we 9allou Monsieur nektbou bel 3arbi walla bel francais!!!
3ayet 3lih we 9allou ekteb 7atta bel chinois!!
3ad ena ktebt haka el noss war9a we houa zeda we hazzinehomlou.
chad war9ti loula we m3a koll star ya9rah eyhezz rassou we yegu7erli ... wena lebed
emba3ed chad war9et si 3mor we bdé ya9ra ... kif kammel hazz rassou we jéna yejri ... we tabbass 3la 3mor we 9allou bi koll

tiba we 2i7tiram : "weldi ... 3aychek 7awel ma3edech tji emma5er"!!!!!!!!!!!!!!!!!
ena el 7assel mé fhemt chay wa9teha ... ema mba3ed kif 5rajna we 93adna ena we 3mor na7kiw 9alli elli houa kdheb we 7att fel

noss war9a elli bouh ra2is markez !!!!
ihhhhhhhhhhhhhhhh ritou etta3lim we rejjelet el ta3lim fin wesslou!!!!
el mouhem hedheka ken awal darrss et3allemtou fel college!
enssit bech en9oulelkom elli el prof hedha tla3 prof el maths.
el 7assel et3addet el ayyamet we et3arreft 3la b9eyet el classe ... etc
3ad emba3ed chhar walla zouz mé netdhakkerch mli7 ...
3addina devoir de controle mta3 maths ... 5demt haka el devoir belgudé.
3ad enharet elli rajje3elna el devoirat akthar wa7ed 5dhé 5/20 wena 5dhit 3/20!!!! pourtant 5edmou mli7 we barcha zeda m3aya

5admin belgudé!!!!!!!! awal marra fi 7yeti na5ou 3dad a9al mel moyenne!!!!!! sar feya haka el nhar!!!
3ad kif rawa7t warrit el war9a el darna (3malt kif 90% mel tlemdha) we el 7aj baba 3mal kima 90% mel ébe2 we 3tani tri7aaa!!!
ya baba rani 5demt mli7 ... ya baba rahou ghlatli walla 7aja .... chay el nefe3 rabbi
we ghodwa essbe7 et7azzem we mché m3aya lel collège (zeda kif 90% mel ébe2)!!!
ed5elna men beb el idara nal9a oueld we bnet classi el koll(ella 3mor) we el classet lo5rin elli ey9arri fihom haka el prof,

elkollhom jeybin wéldihom em3ahom we dayrin eb si el prof, we 3yat we zyat... el 7assel el 7all el i9tar7ou si el prof 3la

les parents mta3na houa tout simplement elli oueldkom na9ssin weyelzemhom ya9raw wtid!!!!!!!!!!!! ritou el wa9a7a!!! we

sadd9ouni elkollhom e9tan3ou !!! emmela 7atta houa el3abha we 7bakha belgudé!!

Tran.............( etnajjmou tet5aylou 9orrs en7ess dhrabt 3lih b 3essa sghira kima el 3erwi bel dhabt :p)

PS : thx ya jme3a 3al les comments we sam7ouni wa55ert 3la 5ater ghatess fel 5edma layyemet)

ellila bech ne7kilkom 3lé rou7i ...
ih 3la rou7i ... oueld_el_7aj
ena yalli ta9raw fi hal blog, cheb fi mo9tabel al 3omor,
twil, we zid rabbit kerch sghayrouna ... echbini bdit men hena
hat nebdaw men heka ellila ..
ellila elli el 7aj ebbay we el 7ajja ommi rabbi eyfadhlehom 3amlou haka el 3amla ...
welli mé fhemch ... méys2elnich
3ad emba3ed 9 ochhera betamam wel kamel ...
we emba3ed 9 ochhera men errakcha wel ennoum fel défa ...
tallat haka elli ey9ouloulha doctoura ... latrabba7hé
el wa7ed ken mekel chereb seken .. we heya tji et7eb et5arrejni,
bettbi3a emba3ed sira3 marir we 3irak chadid...
we emba3ed ma 3aytet haka eddoctoura louled 7oumetha el fermeleya
we kima ey9oulou el kathra teghleb echaje3a ...
el mouhem ghelbouni we 5arrjouni men dari ...
5arrjouni men ghir edhen mel ma7kema we men ghir mé yab3thouli war9a m3a elloussi.
el 7assel madhloum men nhari loul.
wemba3ed toufoula mali2a bel lou3ab we bel bouss ( belléhi en7eb en7ell 9aws 3la 7keyet el bouss
echbihom yarmiw fi chfeyfhem fin jé wa9t elli konna sghar !!! )
3ad wa9t elli kbert chowya da55louni lel koutteb ....
ihhhhh ya 7assra 3la haka el koutteb we 3la sidna el meddeb we 3la fal9tou lebnina ..
emba3ed mé stenesst bheka el koutteb we 3malt fih sou7ab , 3amlou haka hazzouni el mekteb...
we kima el sghayrat el koll, 93adt se3a ched fi roubet ommi we dmou3i habta bech mat5ellinich wa7di fel
ennhar loul, ayya men ghir bleda ... echkoun ma3melhech ma7ssoub.
we fi heka el makteb 7abbit .... eyyyh 7abbit, 7ob béri2 mouch kif 7ob essghar
7abit tofla bydha we ch3arha ak7el ... mezyena we finou mé tetsawrouch 9addech.
el mochkela elli louled fel mekteb elkoll ey7ebbouha.
tetsawrou ya kiram elli chtar louled etfacch5ou we eddamdou 3leha we heya mafibelhech !!!!
eyyyyyh ... wa9teha el 7echma kenet mawjouda, ema kenet 3endena wassila o5ra bech enkllmouha
3la 5ater elli you9ef 9oddemha eylebbou la3ra9 we eytekwenssa. 3ad konna nektboulha kelmet
7lowin fi war9a we emba3ed na3mlouha sarou5, we tak doub mé yetleffet el mou3allem ... nab3thouh el tawletha
el 7assel win heya 9a3da, lezem tal9a 20 sarou5 ardh-jaw te7teha.
we emba3ed mé no5rjou mel makteb .. netlammou fel bat7a we nabdaw net3arkou, elli hedha ey9oul heya et7ebbni ena
we tabda el 7ar, ihhhhhhhhhhh ech et9att3ed mnedel we etfarrtet krateb we edhamghet ryouss.
bref ena tawa yelzemni nemchi
jo3t ... wel jou3 kima ta3rfou kéfer.
inchallah el marra ejjeya enkammlelkom le7keya

hey ahawka 7atta wabch fikom ma posta rbo3 kelma .... behi
lé 3aleyna, narj3ou le7keyetna ...
le7keyti ...
le7keya ...
3ad 9olna el7obb wel bara2a ... houma el 7a99 mta3 rabbi mé dawmouch barcha ...
Ibliss kima ta3rfouh dima eyzonn ...
emba3ed 3ad kbert chowya , we mouch lezem tes2lou haka ettofla elli 7abbitha ena we wled classi el koll fin mchet
emchat we akahaw ... taw narj3oulha emba3ed 3la 5ater na99elt mel makteb.
en7eb ne7kilkom 3al sixième ...
el sedssa edtida2i ... iiiiiih ayyamet
kont mel noujabé2 ...
kont kif nekteb 7aja fel imti7an mta3 el ta3bir el kitabbi, lezem el mou3allem yafra7 beya we ya9rah 3la
b9eyet el class, la ma7ala mokontech wa7di thamma zeda barcha jenoun ya9raw m3aya.
kenet 3endi mou5ayla kbira barcha, ayya etsadd9ou ya jema3a, tall3ou ech kont en7eb natla3????
lé pilote, lé toubib, lé astronaute ...
juste NAJJAR, eyyhh najjar minuisier bel souri !!!!
ken 3endi sandou9 fih el matériel mta3 el nejara, het na3mlou el inventaire :
01 mtar9a kbira
01 mtar9a sghira
150 moussmar em3awej
01 kolléb
01 testra
312 laguchet lou7 ( presk déchets najjar el 7ouma el koll)
ey akahaw, ma 5allit mé sna3t, kréssi, méyed, we barcha 7ajat ma3reftech lechnoua yasl7ou
ema el 9assem el mochtarek lel 7ajet elli sna3thom, houa el ghmoudh!!!!...
s7i7 el korssi elli sn3atou ey9a33ed, emaaaaaa rahou ma ta3rfou kourssi, ken kif ena en9ollek rahou korssi ...
Enzidkom 7aja, ya sidek ena awal tounssi sna3 tayara!!!!!!!!!!!!!!!!!!!!!
ah ... kifech ... tayara !!!!!!!!!!!!
eyyyh tayara, tayara istahlket 80% men ma5zoun el lou7 mté3i ....
rakom tes2lou : we TARET !!!!!???????????
ti bettbi3a lééééé....
ema el marwa7a mte3ha daret!!!
wallahi ya jme3a... wa9teha mani fi beli ettayara heya marwe7a we cabine lou7 kima fel koumik.
mé tetsawrouch 9addech 7zent wa9t elli mataretch ...
ema kif kbert ( we yé litni mé kbert) 3raft 3léch mé taretch ...
el 7assel, wa9t elli est7a99it el tarf lou7, farrekteha we 3awed raskelt ellou7 mte3ha
chi3ari fel nejara ken : 7att chay maydhi3!!!
Narj3ou 3ad lel sizième, mena 9ollna 3ametha bech en3addi elsizième,
el 7assel fel tajribi jit mel awa2el, elmou3allmin we baba we ommi far7anin
3ad jech wa9t el examin final, 9awemtni ommi essbe7 bekri, we jé baba 9ra 3leya chowya 9or2en
we emba3ed chrrbouni mé zemzem, we wakklouni 3ssal we 3dham we zit zitouna we ham azra9!!!
el 7assel 3abbaweni kif echakwa mta3 ellben
ech 5alleni doub mé bdé el examen 5arrejt koll chay fi dharba wa7da we 3la keswet el prof elli ey3ess...
ti el moufid, 5dhit haka el sizième el ma7nouna
we 5rajt men mar7elt ettfoula ...
we ed5alt el mar7elt el mourah9a ...
wel marra ejjeya enkemmelhelkom
we essalem